《三個月的分居》
作為已婚人士，我好少講咩暗戀、單戀、苦戀之類嘅故事，因為我已經差唔多忘記呢種感覺喇，同埋今日仲寫咁嘅題材，一定會俾老婆問：「啊，你邊度嚟咁多靈感呢？」就算一個平常人都會知，我寫鬼故唔通真係要見過鬼咩……但作為一個求生慾極強嘅小男人，我講都唔敢講。
結婚差唔多兩年，你問我結婚同拍拖有咩分別？我之前都真係唔係好答到你，咪又係同一個人一齊，簽咗紙，唔會有種神秘嘅力量令件事唔同咗，除咗兩個人婚後都肥咗一截之外。
但最近因為屋企漏水，要重新裝修三個月，我同老婆就分開咗，各自返娘家，當晚我搬咗野上貨車之後，係車上面，我不其然同最熟嘅兄弟們講！
「我自由喇！！！！！哈哈哈！！！！！」
我知實有人會心諗，喂你咁想自己一個，咪離婚或者分手囉，但我想講，呢個唔係愛唔愛一個人嘅表現，而係有種放假嘅感覺，我仲記得當年寫過一篇文，講女朋友去旅行，男方就好似中六合彩咁，時間多到唔知點用，而今次我中頭獎，有三個月時間呼吸一種名為做仔嘅空氣。
兩個人住嘅時候，一間屋係得兩個人，家務唔係你做就係我做，收工食完飯返到屋企再整呢樣個樣，都差唔多十一點先叫清閒少少，但今時今日，我放工返屋企有飯食，食完執都唔駛執，洗又唔駛洗，沖個靚涼之後，都仲係九點鐘，時間多到唔知點用好。
而我哋都重新返到一個要傾電話嘅年代，往時返到屋企咪見到，傾電話都係講兩句今晚食咩啊，有咩特別野要做之類嘅，但依家兩個人分開住，夜晚再次講起電話時，都真係有種返去拍拖時嘅感覺。
以前食飯一齊食，食完一齊返屋企，依家食完飯，送老婆返屋企又好，送佢去車站搭車都好，都可以重拾當年嘅感覺，目送佢上樓上車，講句拜拜，再msg佢，就好似未結婚一樣。
有晚佢問我，我係咁歌頌返娘家幾好幾好咁，咁係咪以後大家分開住會開心啲？
我話咁你返去住又開唔開心？佢話不知幾開心，做女乜都唔駛做，我阿媽做野乾淨企理過你好多，乜都唔駛擔心，仲唔駛鬧人添！
我都同佢講，依家覺得太得閒喇……我好懷念一齊住嘅時候，你每日都折磨我，點我做呢樣個樣嘅時刻，家陣乜都唔駛做，我好似周身唔自在咁。
講係咁講，自由同自在嘅空氣係清新，但係呢種空氣之下，你會知道你亦失去咗好多習慣咗嘅事。
結婚有咩唔同？人無唔同，但你同佢嘅生活已經連結成一體，每晚你同佢相處嘅時間，一齊睇下片，幫佢吹頭，沖茶遞水等等，你叫一聲，佢就答應；比起拍拖時行街睇戲食飯，你已經唔需要特別搵野一齊去做，而係兩個人係同一個地方就夠。
呢段時間，分開住分開訓，最大得著係，再自由再舒服又點，無咗妳，硬係差咁少少。
－－－－－－－－－－－－－－－－－－－－－－－－－
《弊傢伙，我女朋友有咗》經已上架，有興趣的朋友歡迎點擊下列連結購買。
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：�https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
Search